Sálmabók

1 Ég byrja reisu mín, Jesú, í nafni þín, höndin þín helg mig leiði, úr hættu allri greiði. Jesús mér fylgi' í friði með fögru englaliði. 2 Í voða, vanda´ og þraut vel ég þig förunaut, yfir mér virstu vaka og vara á mér taka. Jesús mér fylgi' í friði með fögru englaliði. 3 Þá vil ég þakka þér nær þú hefur hjálpað mér sem Jakob faðirinn forðum með fögrum bænarorðum. Jesús mér fylgi' í friði með fögru englaliði. 4 Þú skalt í allri nauð ætíð vera minn Guð, þér vil ég þjóna, trúa og þakkargjörð tilbúa. Jesús mér fylgi' í friði með fögru englaliði. 5 Mitt hjartans trúartraust til þín er efalaust, að mér með miskunn skærri munir þú vera nærri. Jesús mér fylgi' í friði með fögru englaliði. 6 Ljóst þegar lífið dvín leið þú mig heim til þín í föðurlandið fríða, firrtan við allan kvíða. Jesús mér fylgi' í friði með fögru englaliði.

T Hallgrímur Pétursson (1632) 1637 – Sb. 1972

L Jacob Regnart 1574 – Vulpius 1609 – Schein 1627 – Sb. 1619 – Sb. 1997

Auf meinen lieben Gott (íslensk breyting)

Eldra númer 493

Eldra númer útskýring T+L