Sálmabók
646. Helgunarklæðið hafði eg misst
Trúarlífið - Iðrun og náð
1 Helgunarklæðið hafði' eg misst,
hlaut því nakinn að standa.
Adam olli því allra fyrst,
arf lét mér þann til handa.
Syndanna flík ég færðist í,
forsmán og minnkun hlaust af því
með hvers kyns háska' og vanda.
2 Burt tók Jesús þá blygðun hér,
beran því lét sig pína.
Réttlætis klæðnað keypti mér,
kann sá fagurt að skína.
Athvarf mitt jafnan er til sanns
undir purpurakápu hans,
þar hyl ég misgjörð mína.
T Hallgrímur Pétursson Ps. 24
L Coverdale um 1535 – Magdeburg 1542 – Gr. 1594
Van allen Minschen affgewandt
Eldra númer 198
Eldra númer útskýring T+L