Sálmabók
372. Kallið er komið
Guðsþjónustan - Andlát og útför
1 Kallið er komið,
komin er nú stundin,
vina skilnaðar viðkvæm stund.
Vinirnir kveðja
vininn sinn látna
er sefur hér hinn síðsta blund.
2 Margs er að minnast,
margt er hér að þakka.
Guði sé lof fyrir liðna tíð.
Margs er að minnast,
margs er að sakna.
Guð þerri tregatárin stríð.
3 Far þú í friði,
friður Guðs þig blessi,
hafðu þökk fyrir allt og allt.
Gekkst þú með Guði,
Guð þér nú fylgi,
hans dýrðarhnoss þú hljóta skalt.
4 Grátnir til grafar
göngum vér nú héðan,
fylgjum þér, vinur. Far vel á braut.
Guð oss það gefi
glaðir vér megum
þér síðar fylgja' í friðarskaut.
T Valdimar Briem – Sb. 1886
Kallið er komið
L Þjóðlag frá Slésíu – Breslau 1842 – JH 1885
Schönster Herr Jesu
Eldra númer 271
Eldra númer útskýring T+L