Sálmabók

1 Í dauðans böndum Drottinn lá frá dauða svo vér sleppum en upp reis dauðum aftur frá svo eilíft líf vér hreppum. Í Guði því oss gleðjast ber og gjalda þökk og syngja hver af hjarta: :,: Hallelúja. :,: 2 Á jörðu fyrri sást ei sá er sigrað dauðann fengi því sárt á öllum syndin lá og sýkn varð fundinn engi. Í ríki dauðans vorum vér en veldi þessa ríkis er nú hrunið. :,: Hallelúja. :,: 3 Á hólm við dauðann Guðs son gekk að gætum sigur hlotið og hann í dróma hnepptan fékk og heljar vígi brotið. Í sigur dauðinn svelgdur er, hans sáran brodd ei þurfum vér að hræðast. :,: Hallelúja. :,: 4 Í heimi þrátt var styrjöld stríð en styrjöld sú var hörðust er þá var háð til lausnar lýð er líf og dauði börðust. Á dauða sigur dýrðlegan með dauða sínum lífið vann, því hljómi: :,: Hallelúja. :,: 5 Guðs eigin son í heimi hér í hrelling dauðans seldur vort páskalamb nú orðinn er sem allri blessun veldur og heilagt benjablóðið hans gegn banaspjóti morðingjans oss hlífir. :,: Hallelúja. :,: 6 Því páskahátíð höldum vér með helgri trúargleði og tignum hann sem líf oss lér og lækning veita réði. Nú dagur skín en dimman þver, í dalnum syndamyrkurs er nú heiðskírt. :,: Hallelúja. :,: 7 Nú látum sálir saðning fá af sönnu lífsins brauði, hið forna súrdeig sjást ei má því sálum það er dauði. Sjá, brauð af himni hlutum vér, það himnabrauðið Kristur er, vort hjálpráð. :,: Hallelúja. :,:

T Latn. hymni frá 11. öld – Martin Luther 1524 – ME 1555 – Sb. 1589 – Nikolaj F.S. Grundtvig 1837 – Helgi Hálfdánarson – Sb. 1886

Christ lag in Todesbanden

L 11. öld – Martin Luther 1524 – Johann Walter 1524 – Gr. 1594

Christ lag in Todesbanden

Eldra númer 157

Eldra númer útskýring T+L

Biblíutilvísun 1. Kor. 15.3–5, 55–57